Natabuan lamang nga nagsundanay ang nagluntad nga linog sa Luzon sang nakaligad nga adlaw kag sa Visayas kahapon.
Ini ang ginpahayag ni Engr. Rey Antioquia sang PHIVOLCS -Roxas.
Ginpaathag ni Antioquia nga adlaw- adlaw may nagaluntad nga linog sa nagkalain-lain nga lugar sa kalibutan lakip na sa kadadalman sang kadagatan.
Apang ang natabu nga linog sa Pilipinas ang nagsundanay kag pareho nga nag-igo sa urban areas kabangdanan nga nagtuga sang alarma kag kahadluk sa mga pumuluyo.
Nahibaluan nga sang nakaligad nga adlaw, gintay-og ang Luzon sang magnitude 6.1 nga linog nga nagtuga sang pagkaguba sang pila ka structures kag nagbilin sang 16 ka patay kag madamo ang napilasan.
Samtang kahapon, gintay-og man sang 6.5 magnitude nga linog ang Eastern Samar kag nabatyagan sa iban nga bahin sang Visayas.
Dugang pa ni Antioquia nga ang linog tuga sang paghulag sang mga plates kag pagbunggu-anay sa idalum sang duta kag nagaluntad ang mabaskog nga pag-uyog kon maghulag ang mga ini malapit sa fault lines.
