Patay ang maglola tungod sa malala nga naangkon nga sunog sa mga nagkalain-lain nga parte sang lawas matapos nga nasunog ang tyangge sini pasado alas 3:30 sang kaagahon sang Dominggo nga adlaw, Abril 7, 2019 sa Sitio Imbong, Barangay Lam-afus, Banga, South Cotabato.
Ginkilala ni SFO1 Dennis Benedicto, fire investigator sang Bureau of Fire Banga ang mga biktima nga sanday Rofia Dacay, 58- anyos kag ang apo sini nga si Islamiah Imba, 5-anyos.
Ginkumpirmar ni SFO1 Benedicto nga alas 6:46 na sang aga ginreport sa ila ang insidente amo nga nagpatigayon na lang sila sang imbestigasyon sa lugar.
Base sa ila nga imbestigasyon nagbrown-out sa nasambit nga lugar amo nga nagpasiga sang sulo ang lola kag sang nakabugtaw kag maggwa kuntani ang 5-anyos nasandadan sini ang sulo kag nagtabog sa ginabutangan sang mga ini sang ginabaligya nga gasolina.
Dugang pa nga sang nakita sang lola nga nagggwa matapos nga nag-init sang tubig nga nagadaba-daba ang kalayo sa sulod sang tyangge ginbalikan pa ang apo, apang pareho na sila nga nakaangkon sang malala nga sunog sa lawas.
Gindala pa sa South Cotabato Provincial Hospital ang mga biktima kag ginsaylo sa syudad sang Davao, apang ginbawian man sang kabuhi.
Nagalab-ot naman sa P25, 000.00 ang inisyal nga danyos sa nasunog nga tyangge.
Advice naman ni SFO1 Benedicto sa tanan nga maghalong kag likawan ang pagtago sang gasolina sa sulod sang balay.
