Nasuta na sa mga opisyal sa Bureau of Customs, Philippine Drug Enforcement Agency o PDEA, National Intelligence Coordinating Agency o NICA ug uban pang mga opisyal sa gobyerno nga walay sulod ang usa sa tulo ka magnetic lifter nga gikan sa China nga gidiskarga sa barko sa pantalan sa Tagoloan, Misamis Oriental niadtong milabayng semana.
Mao kini ang gibutyag ni Customs District Collector Floro Calixian, sabay sa iyang pag-ingon nga ilang gi-ablihan ang usa sa tulo ka mga magnetic lifters kay ilang gisusi unsay sulod sa nasangpit nga kargamento.
Matud ni Calixian nga ilang gigamitan sa grinder machine, barina ug snipping dog sa PDEA sa dihang ilang gi-inspeksyon ang nasangpit nga magnetic lifter.
Gidugang ni Calixian nga ilang nakita nga walay problema ang maong kargamento sa dihang gidiskarga kini sa foreign vessel gikan sa abroad diha sa Mindanao International Container Terminal sa lungsod sa Tagoloan, Misamis Oriental.
