Magnitude 6.0 nga linog sa Davao Occidental, walay damyos

Davao City – Gikan sa magnitude 6.6, gipaubos sa Philippine Institute of Volcanology and Seismology (PHIVOLCS) ngadto sa magnitude 6.0 ang linog nga miigo sa Sarangani Island, Sarangani, Davao Occidental alas 09:39 sa buntag, September 26, 2023.

Sa pakighinabi sa DXDC RMN Davao kang Franz Irag, Information Office sa Office of the Civil Defense (OCD)-XI, iyang gibutyag nga normal lamang nga magbaton og kabag-ohan sa impormasyon diin mas sakto na ang updated bulletin nga ginapagawas sa PHIVOLCS.

“Expected gyud nga naay changes from initial bulletin sir kay mas accurate na ang plotting nila,” matud ni Irag.

Samtang, sa pakighinabi sa DXDC RMN Davao kang Police Captain Giecarr June Villarin, Office-In-Charge (OIC) sa Sarangani Municipal Police Station (MPS), iyang gisulti nga bisan sa magnitude 6.0 nga linog, wala ra kini midamyos. Gani, wala ra nabati sa lugar ang maong pagtay-og nga adunay 155 kilometros nga gilawmon.

“So far, wala may (damyos). Wala gyud mi ka-feel ganina. Mura’g part na sa Indonesia to pero ang mo-detect lang sa PHIVOLCS diri duol sa atoa. Sarangani man gud dayon (ang mabutang), pero layo ra gyud kaayo,” matud ni Villarin.

RadyoMaN Kirby Manzon