Davao City – Gipagawas na gikan sa selda sa kapolisan sa Sta. Ana ang driver sa PUJ nga si Rolando Altar ug wala na gidayon ang pagpasaka ug kasong reckless imprudence resulting to homicide, multiple physical injury ug damage to property batok kaniya.
Sa gihimong pakighinabi sa DXDC RMN Davao ngadto sa Traffic Investigator sa Sta. Ana PNP nga si Police Officer 2 Ricky Aperong, dili na matud pa pursegido nga mupasaka og kaso ang kabanay sa pamilyang Tabalwon lakip ang pamilya sa duha ka pasahero nga nabangaan.
Matud ni Aperong nga na areglo na ang kaso ug nagsaad ang tag-iya sa PUJ nga sila na magpahiluna sa patay’ng lawas sa napatay nga driver nga si Badal Tabalwon nga abagahon ang tanan galastuhon apil ang tulo ka mga na angol nga mao sila si Marissa Ocliasa, 24 anyos, Mark Mabasa ug usa ka Rino Tabalawon kinsa padayon pa nga gitambalan sa Southern Philippines Medical Center (SPMC).
Kahinumdoman nga nahitabo ang vehicular accident didto sa R. Magsaysay Ave. corner Bangoy St. ning siyudad human mibangga ang usa ka Rs125 motorcycle nga gimaneho ni Tabalwon ngadto sa PUJ nga gidrayban ni Altar.
RadyoMaN Don Pulayao
