Sa interview sa DXDC RMN Davao kang PSMS Achilles Mosong, imbestigador sa Digos City PS, iyahang giila ang mga biktima nga si Edwin ug Carlito Capuyan, magsoon, hamtong, taga Sta. Cruz, Davao del Sur. Samtang, ang driver nailang si Lendon Cañones, taga Davao City.
Saysay ni Mosong nga ang nahisgutan gikan naghatud og lubong sa ilang kabanay, ug sa ilang pagpamauli, nawad-an og kontrol ang driver rason nga nabangga kini sa center island.
“Before sa nahitabo, nakita ‘to sila sa TMC (Traffic Management Center) didto sa kanto sa traffic light, kusog na ilang padagan. Siguro pag-abot nila sa tulay, sa kurbada nga portion sa dalan, na-overshoot sila ato. Nadiretso sila’g bangga didto sa island,” saysay sa imbestigador.
Tungod sa impact, natumba ug nadamyos ang motor samtang nakahiagum og injuries ang mga sakay. Gisulayan pa og dala sa ospital ang mga biktima apan gideklara na nga dead on arrival ang mga angkas samtang kritikal sab ang kondisyon sa driver sa motor.
Nagsubo sab ang pamilya ug kabanay sa mga biktima sa pagkawala sa duha nila ka family members ug bag-ohay lang napahilona ang ila sab nga kabanay nga mipanaw.
RadyoMaN Kirby Manzon
