Davao City – Patay ang magsuong babae nga taga brgy. Calinan proper dinhi sa Davao City tungod sa dengue.
Sa pakighinabi sa DXDC RMN Davao kang Mel Babante, Davao City Health Office Pest Control Worker II, naadmit sa ospital sa Calinan ang magsuong 13 anyos ug 8 anyos niadtong miaging semana apan gi-refer kini sa doctor nga dalhon sa Southern Philippines Medical Center (SPMC).
Niadtong gibalhin na kini sa SPMC, nahibaloan sa doctor nga kritikal na ang kahimtang sa mga biktima.
Saysay matud pa sa inahan sa mga bata nga nagasuka na og dugo ang mga bata ug bloated na ang mga tiyan niini.
Wala na matud pa naabtan og dugay sa ospital ang mga biktima ug nakabsan na sa kinabuhi.
“Ang maghulang namatay og alas 11 sa August 15 (2020) human ang manghod namatay og alas 2 sa kadlawon niadtong Domingo,” segun ni Babante.
Sa pagpanubay sa CHO, posibleng nakuha sa mga bata ang dengue virus gikan sa mga lata ug ligid nga napondohan og tubig gikan sa naabandonang balay nga duol sa gipuy-an sa mga biktima.
Naglusad og fogging ang CHO ug gisigurong magpadayon ang kampanya kontra dengue nunot sa COVID-19 pandemic.
RadyoMaN Renz Barbarona
