Davao City – Na-dismantled sa Philippine Drug Enforcement Agency XI ang drug den sa may St. Uriel Street, Coca Cola Village, Matina, Davao City alas 8:45 adlawng Dominggo.
Sumala ni PDEA XI Regional Director Antonio Rivera atol sa interbyu sa RMN Davao nga nahagbong atol sa ilang gikasang buybust operation ang Regional Target nga si Felimon Panilagao Jr. Alyas Benjo ug igsuon niini nga gikonsiderang Number 14 drug personality sa Davao Region nga si Joel Felimon Panilagao alyas Weng-Weng, 49 anyos, negosyante ug Noel Felimon Panilagao alyas Bibo, 52 anyos.
“Naa ni sila’y tig-deliver diha taga Bangkerohan tapos gakuha pod ni sila didto sa Cotabato. Naa ni sila’y mga kauban nga anaa sa atoang watchlist,” matud ni Rivera.
Napalitan sa asset sa PDEA ang mga suspek og usa ka medium transparent plastic sachet sa gituohang shabu nga nagkantidad og P14,000.00 ug narekober usab sulod sa giingong drug den ang usa ka dako ug 3 pa ka mga gagmayng pakete sa shabu nga mobalor ngadto sa P150,000.00 ug mga drug paraphernalia.
Matud ni Rivera adunay laing duha pa ka mga drug suspects ang nakaikyas atol sa maong drug operation.
Kasong may paglapas sa RA 9165 ang gipasang-at batok sa mga suspek kinsa priso na karon sa PDEA XI detention facility.
Adunay pasidaan si Rivera sa mga nagpadayon gihapon diha sa paggamit sa iligal nga droga.
“Dapat muundang na sila kay mas gipakusgan nato ang atong operasyon tapos kusog na gyod ang impormasyon nga muabot sa amoa because sa matag barangay gi-empower na nato ang mga barangay officials nga mureport sa atoa just in case nga adunay mga constituent nila nga involved sa droga,” segun ni Rivera.
RadyoMaN Aimee Guinita
