Magti-ayon sa Asuncion gitigbas ug gipusil; bana patay, asawa kritikal

Davao City – Dead on the spot ang usa ka lalaki samtang kritikal ang asawa niini human gitigbas ug gipusil sa tulo ka suspek nga misulong sa ilang balay miaging adlaw alas-12:30 sa kadlawon sa Purok 10-A, Sitio Bangkawan, Barangay Binancian, Asuncion, Davao del Norte.

Sa report sa Davao del Norte Police Provincial Office, subay sa imbestigasyon sa Asuncion MPS, giila ang biktimang magtiayon nga sila alyas “Jay,” 37-anyos, usa ka mag-uuma, ug iyang asawa nga si She, 38-anyos, kinsa milagrosong nakalingkawas bisan pa man sa mga samad sa ulo, nawong, ug kamot.

Base sa imbestigasyon sa Asuncion MPS, ang magtiayon giatake sa tulo ka lalaki nga gituhuang silingan nila, lakip na si alyas Eboy. Pag-abli sa pultahan, kalit lang, matud pa, kining nanigbas sa makadaghang higayon gamit ang sundang, ug human niini, gipusil pa si She gamit ang “jolen gun,” ingon man gisuwayan pa nga sunugon nga buhi.

Hinuon, nakalingkawas pa ang babaye ug anaa na karon sa Davao Regional Medical Center sa Tagum City.

Padayon sab ang hot pursuit operation nga gipangulohan sa Asuncion MPS ug Regional Police Support Battalion–Sonlon Cluster, uban ang tabang sa 60th Infantry Battalion, aron masikop ang mga responsable. Samtang, gitutukan usab sa mga imbestigador ang motibo sa pagbuhat sa brutal nga krimen.

RadyoMaN Kareen Beltran