Davao City – Patay ang magtiayon human sila girakrakan og pamusil sa duha ka mga armado sulod sa ilang balay sa may Purok 25 Malagamot, Panacan, alas 6:30 kagabii.
Nabalot og samad pinusilan ang mga lawas resulta sa hinanali nga kamatayon sa mag-asawa nga sila si Jose Apor, 58 anyos, ug Sylvia Apor, 50 anyos, mga residente sa mao nga lugar.
Sa imbestigasyon sa Sasa PNP, gisulod sa balay sa duha ka armado ang mga biktima ug didto gibanatan og pamusil gamit ang .45 nga pistola.
Nasaksihan sa pag-umakon nga si Michelle Martinez nga nahapla na ang magtiayon samtang gitiwasan og pamusil sa duha ka mamumuno.
Dali migawas sa balay si Michelle aron dili siya apilon og luthang samtang misakay sa motor ug dayon sibat ang mga suspek kinsa gihulagway lang nga nakasuot og itom nga jacket, naka kalo, tama-tama ang panglawas ug nagpangidaron og 20 ug 30 anyos.
Narekober sa crime scene ang ubay-ubay nga empty shell ug deform slug sa .45 nga pistola.
Gipalawman na sa kapulisan ang ilang imbestigasyon aron matumbong ang motibo ug aron mailhan ang mga suspetsado.
RadyoMaN Joel Viray
