Padajon kuman an makuting imbestigasyon sa mga otoridad sa insidente nan pagpamusil sa magtiayon sa may exit gate nan SPUS sa brgy.Luna inin syudad,alas 5:45 kapin kon kuyang an oras..Tagkilaya an mga biktima na sila Paul Pontius Ouano Gogo, 48 anyos lakip an asawa na si Abegail Yap, 46 anyos.
Nadaya pa an duha ngadto sa SPUS Hospital pero nakutluan sa kinabuhi si Abegail resulta sa igo sa lain-laing bahin sa lawas samtang si Pontius Gogo an kritikal an kondisyon, tagtakda dad-on sa laing hospital sa CDO.
Sa inisyal na imbestigasyon nan City PNP, una na nagduwa pa nan basketball si Gogo kaiban an HS ’87 batchmates niini suyod nan SPUS compound.Pag-uli na nan magtiayon sakay sa ila Isuzu Mu-X ug sakay sa likod an ila isa ka anak, nag-atang na an mga suspek na sakay sa motorsiklo na wayay plate number, an driver an nagsukbot nan helmet ug an backrider nagkalo. Tagpabuthan dajon an magtiayon sa dihang didto na sa exit nan SPUS. Nakaangkon nan mga igo sa .45 kalibre sa armas an mga biktima.Isa sa motibo na tag imbestigahan kuman sa mga otoridad an may kalambigitan sa away sa lupa o land dispute.
