Davao City – Wala nay kinabuhi nga nakaplagan ang usa ka babae human kini naanod sa baha nahitabo pasado alas-7 sa gabii (October 1, 2021) sa Purok Manga, Brgy Soong, Digos City, Davao del Sur.
Sa interbyu sa DXDC RMN Davao kang Emelda Canoy, personahe sa City Disaster Risk Reduction and Management Office (CDRRMO) sa Digos, giila niini ang biktima nga si Roselyn Artobado, diin nasayrang gisundo ang biktima sa iyang bana gamit ang motorsiklo ug sa dihang milatas kini sa culvert bridge sa lugar didto na naanod ang biktima uban ang motorsiklo tungod sa kusog nga tubig ug pakyas na usab kini nga naluwas sa iyang bana.
Alas-8 sa buntag (October 2, 2021) sa dihang narekober ang patayng lawas sa biktima sa Barangay Kiagot, ubos nga bahin gikan sa nahitaboan sa insidente.
“Kagabii (October 1), alas-9:30 mao ‘tong pagtawag ni kapitan diri. Na-missing nalang siya (biktima), naanod sa tubig. Mura’g patay nga sapa unya kalit lang og dako ang tubig. Kanang mura’g culvert lang ba. Dili gyud ingon nga gina (agian) siya’g kusog nga tubig. Naatlan lang gyud siya ba nga didto nag-agi siguro ang tubig,” saysay ni Canoy.
Pahimangno sa CDRRMO nga kanunay nga mag-igmat ug magbantay panahon sa pag-ulan ug dili magkumpyansa nga mutabok og sapa labi na kung peligroso na ang sitwasyon.
RadyoMaN Kirby Manzon
