Sa interview sa DXDC RMN Davao kang PLtCol. Florante Retes, Chief of Police sa Digos Police Station, iyahang giila ang biktima nga si Jolito Cardines, nagamasahero nga residente sa maong barangay.
Sa imbestigasyon, dunay tulo ka pasaherong nagpahatud kaniya nga mao ang magtiayon nga sila Danny Lagindab ug alyas Joy, ug usa pa ka lalaking ilang kauban. Pag-abot sa lugar, buot matud pang kuhaon sa usa sa mga suspect ang sakyanan ug gidunggab ang driver sa makadaghang higayon, nga dali usab nga nakapangayo’g pakitabang. Matud sa pulis, luwas na sab ang biktima sa makuyaw nga kahimtang.
“Paghatud didto sa Paradise mi-declare (ang suspect) nga kuhaon niyang pedicab unya gidunggab siya. Gikuha iyang pedicab pero nakapangayo siya’g tabang didto. Nabilin ang iyahang asawa. Mao ‘to atong gidakop,” sulti ni Retes.
Nakakustodiya na karon ang nadakpang babae samtang lakip gihapon sa gikasuhan ang nakasibat nga duha pa og carnapping, physical injuries ug posibilidad nga attempted homicide.
RadyoMaN Kirby Manzon
