Sa interbyu sa DXDC RMN Davao kang Police Corporal Francis Louie Luciano, imbestigador sa Compostela Municipal Police Station (MPS), giila niini ang biktima nga si Jerson Escuadro, 32 anyos, taga-Purok 3, Barangay Osmeña, Compostela, Davao de Oro. Samtang ang partner niini mao si Jessa Lausa, nga maoy nag-drive sa motorseklo.
Sa inbestigasyon, padulong Montevista ang duha ka sakyanan sa dihang nahitabo ang insidente.
“Istorya sa mga nakakita, ang nag-drive babae nga bag-ong tuon. Then, naay nagsirbato, nakuratan, giilog sa kadtong back rider nga iyahang live-in partner pud. Napadulong sila sa wala nga karsada,” saysay sa imbestigador.
Didto na nalatayan sa ligid sa Jian Liner Bus ang lalaki rason nga nabuak ang ulo niini, samtang injured usab ang babayi nga daling gidala sa hospital.
Matud sa pulis, magbaton ang duha ka kampo og amicable settlement diin abagahon sa bus owner ang gasto sa pagpalubong sa lalaki ug gasto sa hospital sa babayi.
Pahimangno sa awtoridad ilabi na sa mga naga-motor nga mag-amping sa pagbiyahe sa dalan. Nasayrang walay helmet ang duha, walay lisensya ug walay rehistro ang motor nga ilang gigamit.
RadyoMaN Kirby Manzon
