Davao City – Gibatig kaminghoy ang abaga sa magtiayon sa dihang nahurot ang ilang kwarta sa usa ka tikas nga sugal.
Mireklamo sa San Pedro PNP ang magtiayong sila si Geovani Millano, 28 anyos ug si Romedith Melano, 27 anyos, mga residente sa may Shrine hills, Matina sa dihang nailad kini sa usa ka pasugalan.
Sumala pa niini nga bandang alas 10:20 kagabii, nanuroy ang magtiayon ug sa pag abot nila sa dalang San Pedro gidani sila sa usa ka grupo sa mga kalalakin-an nga motaya sa usa ka dula gamit ang mga taklob sa botelya ug ipapatad ug asa nahimutang ang butones nga ilang girambol sa tulo ka kumbinasyon.
Sa nindut kuno kaayo nga diskarte sa mga wala mailhing mga tawo, nadala sila sa pag patad apan sa kadautang mga palad napildi ang magtiayon sa kantidad nga dul-an 3,000 ka pesos.
Tungod sa tikas, dali midangop sa kapolisan ang mga complainant diin sa pagsubay sa otoridad sa lugar, wala na nila maabti ang maong grupo.
Gipahimangnoan sa kapolisan ang mga biktima nga dili dayon motoo sa mga tawong nagapanghagad og padula kay sagad niini mga modus.
RadyoMaN Paul Canono
