Aurora, Zamboanga del Sur – Naigo sa daghanang samad pinusilan ang magtiayong negosyante human kini gipaulanan ug bala sa mga wala mailhing mga suspetsado kaniadtong milabayng gabie sa Brgy. San Jose, Aurora, Zamboanga del Sur.
Ang mga biktima nailang sila si DANNIS CABAHUG CENIZA, 54 anyos, kauban sa asawa niini nga nailang si IMELDA REALISTA CENIZA, 48 anyos, pulos mga residente sa Burgos St. Purok Madasigon, Brgy. Poblacion, Aurora.
Sa imbestigasyon sa kapulisan sa Aurora nasayran nga nagbyahe ang mga biktima sakay sa single motor gikan sa Brgy. Libertad, Aurora, paingon unta ngadto sa ilang pinuy-anan, apan pag abot sa National Highway of Purok Angela, Brgy. San Jose sa nasangpit nga lungsod sa kalit ug sa walay igong hinungdan gipusil ang mga biktima sa wala mailhing mga suspetsado gamit ang calibre 45 nga pistola base na usab sa mga basiyo sa bala nga narekober sa crime scene.
Nakaangkon ug mga samad ang biktimang si Dannis Ceniza ug daling gidala ngadto sa Aurora Community Emergency (ACE) Hospital located ug gibalhin kini sa Aisah Medical Hospital ning syudad alang sa dugang medikasyon.
Gibutyag sa asawang si IMELDA REALISTA CENIZA nga gilabni sa mga suspek ang iyang dalang bag nga adunay salapi nga mobalor sa tunga sa milyon kapin kon kulang ug ang nagkadaiyang cheke sa bangko.
Daling misibat ang mga suspetsado paingon sa Monte Alegre samtang ang kapulisan usab ang nagpahigayon ug hot pursuit operation alang sa posibleng pagsikop sa mga suspetsado.
