General Santos City—gitulis sa tulo ka mga suspek ang magtiayong negusyante sulod mismo sa ilang balay sa Orchids St., Prk. Sta Cruz, Barangay Calumpang ning dakbayan sa Gensan, gabie sa adlawng Byernes, July 7, 2017.
Ang mga biktima nailhang silang si Bienvinido Salvador Lulu, 67, ug Gloria Tapot Lulu, 61, negusyante ug lumulupyo sa samang lugar.
Sa inisyal nga imbistigasyon sa kapulisan nasuta nga manarado na unta nag mga nahisgutan dihang kalit misulod ang duha ka mga suspek sa ilang panimalay. Sila gipangtiunan ug pusil dungan sa pag deklara ug tulis ug pahimangno nga dili musyagit.
Usa usab ka suspek ang nagpabilin gawas sa panimalay sa managtiayon kansa nag silbing lookout sa iyang mga kaubanan.
Gikuha sa mga suspek ang kwarta sa magtiayon kantidad ug P800,000.00, kansa capital sa mga nahisgutan sa ilang negusyo nga Cash Encashment o nakapangkambyu ug Cheke.
Paspas nga misibat ang mga suspetsado tangag ang kwarta sa mga nahisgutan. Gilayon usab nga mireport ang magtiayon sa Tambler Police Station.
Girespondihan pa sa kapulisan ang lugar apan wala na silay naabtan human nga paspas nakasibat ang mga suspek. sa karon padayon pa ang gihimong imbistigasyon sa kapulisan kalabutan sa insidenti.
