Jamindan, Capiz – Patay ang 56-anyos nga persona matapos nga ginluthang sang mismo manghod sini pasado alas 4 sang kaaganhon sa Barangay San Juan, Jamindan, Capiz.
Nakilala ang biktima kay Erwin Lorenzo y Mauricio, nga nag-angkon sang solo nga pilas sa parte sang tiyan sini kabangdanan sang gilayon nga kamatayon.
Suno sa Jamindan PNP, magka-upod nga nag-inom ang biktima kag manghod nga suspek nga nakilala kay Jerry Lorenzo y Mauricio, 54-anyos ang pang-edaron.
Sa wala mapahayag nga kabangdanan kag bangud sa kahulogbon, nagbaylohanay ang mga ini sang malain nga mga tinaga.
Naggabot sang .38 caliber revolver ang suspek kag ginluthang ang magulang.
Matapos ang insidente, madasig ini nga nagpalagyo.
Sa subong padayon nga at-large ang suspetsado.
