12 ka pilas sa nagkalain-lain nga bahin sang lawas ang naagum sang magulang nga babaye matapos ginbuno sang iya manghod nga lalaki sa barangay Pakiad, Oton, iloilo mga alas 4:30 kahapon sang hapon (Abril 26)
Ginkilala ang biktima nga si Rita Baringue, 54 anyos samtang ang suspek nga manghod sini amo si Alex Melocoton, 48 anyos, trisikad driver, lunsay pumuluyo sang nasambit nga lugar.
Sa interview sang RMN Iloilo, ginpahayag ni Alex nga napuno na siya sa ginahimo sang iya magulang nga pagsimu-simo sa iya kag masami ginahimu-himuan sang sala kag ginapangguba ang iya mga gamit.
Ginpahayag sini nga naghinulsol man siya sa iya nahimo kag wala man siya naglaum nga iya mapatay ang iya magulang.
Dead on arrival sa Western Visayas Medical Center ang biktima samtang priso naman sa Oton Police Station ang suspek kag pasakaan sang nagakaigo nga kaso.
