Davao City – Pabor ang Parents Mobilization Action Group (PMAG) nga silotan ang mga benepisaryo sa Pantawid Pamilya Pilipino Program kun 4Ps nga gaprenda sa ilang mga cash cards.
Gibutyag ni PMAG Focal Person Febe Matthew nga uyon kini masilotan ang mga benepisaryo mapamatud-an nga ginaprenda ang cash card niini.
Alang ni Matthew, dili angay palungtaron og dugay ang pala-utang nga klase nga benepisaryo ug dapat lang nga tanggalon kini sa listahan sa programa.
Hayahay matud pa ang mga benepisaryo sa 4Ps tungod kay igo lang sila nagahulat sa cash assistance matag bulan.
Segun ni Matthew, nag-antos matud pa siya og trabaho aron makabayad og buhis sa gobyerno apan niay wala gabayad og buhis nag-usik-usik sa tabang sa gobyerno.
Sakit sa dughan ni Matthew nga makita ang mga benepisaryo sa 4Ps nga gawaldas ug wala gamita sa minatarong nga paagi ang pinansyal nga tabang sa kagamhanan kanila.
Apelar ni PMAG Focal Person Febe Matthew ngadto sa tanang benepisaryo sa 4Ps nga gamiton sa sakto ang sapi nga ihatag sa gobyerno kanila ug idapat sa mga panginahanglanon sa ilang mga anak ug dili gamiton sa personal.
RadyoMaN Joel Viray
