ILOILO CITY – Bilang kabahin sang pagpanghanda sa malapnagon nga clean-up drive sa syudad sang Iloilo sa Agosto 5 angut sa 80 th charter day celebration, ginsuguran na sang declogging team ang paglimpyo sang mga drainage.
Suno kay City Administrator Atty. Hernando Galvez, magasugod ang pagpaninlo sa outfall sang tanan nga mga drainage agud masigurado ang tayuyon nga pag-ilig sang tubig pakadto sa suba.
Ginsuguran sang declogging team ang pagtinlo sa drainage sa dalan Iznart Barangay Ma. Clara, City Proper; kag mga lugar sa palibot sang Iloilo Central Market kahapon samtang subong naman nga adlaw sa palibot sang Iloilo Terminal Market ukon Supermarket.
Sa Agosto 5 magapanguna sang city-wide clean-up drive ang syudad nga magasugod sang mga coastal areas tubtob sa mga kabarangayan nga pasakupan sang mga ahensya sang gobyerno, barangay officials, mga eskwelahan, NGo kag iban pa.
Ini ang pinakauna nga pinakamasangkad nga clean up drive sa syudad.
