Bilang paggunita sa Malaria at Filariasis Awareness Month, muling pinaalalahanan ang publiko tungkol sa panganib na dulot ng dalawang sakit na ito—mga parasitikong impeksyong maaaring magbanta sa buhay at karaniwang naipapasa sa tao sa pamamagitan ng kagat ng infected na lamok.
Ayon sa inilabas na impormasyon, ang malaria ay kadalasang nagpapakita ng mga sintomas tulad ng matinding sakit ng ulo, pagkahilo o pagsusuka, panginginig, lagnat, pananakit ng kalamnan, at labis na panghihina. Samantala, ang filariasis ay nagdudulot din ng lagnat at pananakit ngunit maaaring humantong sa pamamaga ng kulani, pananakit sa singit, pagbalat ng balat, at malalang pamamanas ng mga braso, binti o ari—kilala bilang elephantiasis.
Upang maiwasan ang kagat ng lamok, hinihikayat ang publiko na gumamit ng kulambo, maglinis ng kapaligiran, magpahid ng mosquito repellant, magsuot ng damit na mahahaba at makakapal, at panatilihing malinis ang mga tahanan. Mahalaga ring bantayan ang kalusugan ng mga bata at alamin ang mga sintomas upang maagapan agad ang mga impeksyon.
Kasabay ng pagdiriwang ngayong Nobyembre, nagpapaabot ang Region I Medical Center ng buong suporta sa kampanya ng Department of Health na makamit ang isang malaria at filariasis-free Philippines pagsapit ng 2030.
Sa tulong ng masusing impormasyon, aktibong pakikiisa ng komunidad, at tuloy-tuloy na programa ng pamahalaan, umaasa tayong mababawasan—at tuluyang mawawala—ang mga sakit na hatid ng lamok sa bansa. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
