Zamboanga del Norte – Sa dili madugay ipahimutang na diha sa Zamboanga del Norte Medical Center ang “Malasakit Center” nga nagtinguha sa pagserbisyo ug pagtubag sa mga medisina ug mga gikinahanglan nga apparatus sa mga kabus nga mga pasyente nga buot magpatambal sa maong hospital nga gipanag-iyahan ug gidumala sa kagamhanang probinsiyal sa Zamboanga del Norte sulod sa dugay nang panahon.
Kini maoy nasayran human gipasupot ni Board Member Ruth M. Brillantes isip Chairman sa Committee on Health, Sanitation and Human Settlement ang resolusyon nga naghatag sa otoridad ug gahum ni Governor Roberto Y. Uy nga mopirma sa Memorandum of Agreement (MOA) tali na ni Executive Secretary Salvador C. Medialdea sa Office of the President (OP) alang na sa maong katuyoan atol sa gipahigayon nga regular session niini sa Lunes, Enero 21, 2019.
Nasayran nga ilawom sa MOA, ang Office of the President (OP) piuaagi kang Medialdea ang mogahin sa kantidad nga Php 5, 000,000.00 sa matag bulan sa tibuok tuig 2019 alang sa “Malasakit Center” diin ang nasangpit nga pundong salapi nagagikan usab sa Socio-Civic Projects Fund (SCPF).
Sa pangutana ni Board Member Romulo P. Soliva ngadto kang Brillantes ngano nga nahilakip ang probinsiya niini, gipasabot ni Brillantes nga kini nagsumikad usab sa iyang pagsulat sa buhatan ni Former Special Assistant to the President (SAP) Christopher Lawrence “Bong” Go subay usab sa tambag ni Regional Director Regional Director Emilia P. Monicimpo sa Department of Health, Regional Office- 9 (DOH-9) sa Zamboanga City.
“This is some sort of one-stop shop and we should be happy,” matud pa ni Board Member Brillantes atol sa maong session. Iyang gipasabot nga ang matag pasyente mamahimo nga makapahimulos sa hinabang diha sa “Malasakit Center” sa dili momenos ug Php 50,000.00 lakip na ang ayuda gikan sa Philippine Health Insurance System (Philhealth), Department of Social Welfare and Development (DSWD) ug uban pa.
Samtang sa publikasyon sa nasudnon nga pamantalaan nga Manila Times pinetsahan ug Enero 19, 2019 ang nagkanayon, ‘Former SAP Christopher Lawrence “Bong” Go clarified that Malasakit Centers are open to every Filipino without needing to get endorsement from a politician or anybody else to avail themselves of medical assistance from these Centers’. (edith/kapihan)
