Davao city – Igo na lang sa paghanduraw si Leah Bacaling sa kaayo ug pagkamatinabangon sa iyang anak nga si Shiela Mae Bacaling karon nga dili na nila makauban ang dalaga.
Samtang nagsaysay si Leah sa kabuotan sa iyang anak nga si Shiela wala usab kapugngi niini ang pagtulo sa iyang mga luha gikan sa duha niya ka mga mata tungod sa kalit nga kamatayon.
Si Shiela Mae usa sa mga call center agents sa SSI Call center nga naapil og kasunog sa NCCC Mall Davao niadtong Sabado ug paig na nakita sa mga rescuers ang iyang lawas.
Gihulagway sa inahan ang anak nga usa ka buotan ug matinahuron nga babaye.
Bilib kini tungod kay madiskarte nga estudyante si Shiela ug gani dunay usa ka adlaw niana nga wala silay sud-an ang gibuhat sa dalaga nagsabaw kini og kamunggay aron baonon sa eskwelahan.
Gipanghambog ni Leah nga nakahuman sa pagtuon ang iyang anak gumikan sa pagpaningkamot sama sa pagpanglaba ug paglimpyo og balay sa iyang mga magtutudlo.
Busa gikalipay og maayo sa inahan nga nakahuman sa pagtuon ang dalaga ug nakatrabaho kay siya na karon ang nagsuporta sa pagtuon sa tulo niya kamanghod.
Gikatakda pod unta hatagan og katuman sa dalaga ang pangandoy sa inahan nga magtindahan apan kini tanan hangtud na lamang sa damgo human mitaliwan sa laing kalibutan ang dalaga.
Matud ni Leah nga plastado na unta ang sabot nila sa iyang anak nga mag-abot sa terminal sa Panabo dala na ang isda ug ubang sud-an alang sa ilang handa sa pagsaulog sa miagi nga pasko.
Apan wala damha niini nga mao na diay kadto ang katapusan nilang panag-istoryahanay.
Giingon sa inahan nga wala siya masayod kung unsay mahitabo kaniya kung makita na niya ang sunog ug paig na nga lawas sa iyang pinangga nga anak.
Gimahay sa nagbangutan nga inahan ang mga firefighters ug ang mga rescuers ug ang mall sa kalit nga kamatayon ni Shiela busa nangayo kini og hustisya sa nadangatan sa iyang anak.
RadyoMaN Joel Viray
