Davao City – Gidasig ni Committee on Health chair sa konseho Dra. Joselle Villafuerte ang management sa mga malls partikular na ang usa ka mall sa may Bajada ning syudad nga palig-onon ang mga security measures para sa tanang mga mall goers.
Subay kini sa lain na usab ka insidente diin usa ka batan-on ang angol human niambak gikan sa 5th floor sa gambalay pila ka minuto una kini mag sirado.
Sa interbyu sa RMN davao sa konsehal nga sulayan niini nga maistorya ‘verbally’ ang management sa mga suhestyon diha sa disenyo sa maong mall aron dili na masubli ang susamang insidente.
Prayoridad usab karon sa lokal nga panggamhanan nga matabangan ang biktima kinsa anaa pa sa balay-tambalan.
“Sana ma-refer siya kay Dra. Bihildis Mabunga ang ating psychiatrist na based sa Institute of Psychiatry and Behavioral Medicine. So sana ma-refer siya doon at ma-assess siya kung papaano siya matutulungan ng government,” sumala ni Villafuerte.
Nanawagan si Villafuerte sa tanang mga netizens nga dili hukman ang gihimo sa biktima ug undangon ang mga harsh comments.
Inay mag post og dili maayo nga makapasamot pa sa gibati sa usa ka tao kinahanglang magtinabangay ang tanan sa pag-reach out niining mga tao nga adunay mental health problems.
“Sa mga kapwa nating Davaoeños na siguro mayroong dinadalang bug-at kaayo ug tan-aw nila nga wala nay pag-asa… pirmi nato huna-hunaon nga life is a gift and problems are not so overwhelming na wala nay solusyon. There is always someone whom you could talk to, it can be a peer or it can be a professional nga pwede natong maduolan,” sumala niini.
Gitataw sa konsehal nga andam kanunay ang gobyerno nga mutabang ug mutunol og counseling sa mga taong nakasinati’g depresyon.
Gilantaw sa konsehal sa sense of urgency nga maduso na gayod ang Mental Health ordinance diin magmuntar og usa ka mental health division aron mamahimong community based ang mental health programs ug dali kining matunol ang serbisyo sa mga nanginahanglan.
RadyoMaN Aimee Guinita
