Davao City – Gibutyag karon sa Davao City Health Office (CHO) nga mikunhod ang malnutrition rate status sa syudad sa Davao.
Sumala ni CHO chief Dr. Josephine Villafuerte nga gikan 9% sukad pa niadtong 2013, mibaba sa .9% na lamang ang malnutrition status sa dakbayan karong tuiga.
Kini human sa mga gipakusgang lakang sa lokal nga panggamhanan pinaagi sa pagpataas sa kahibalo ingon man ang Community Integrated Management for Acute Malnutrition (CIMAM) Program.
“Kasi the malnutrition from severe acute malnutrition (SAM) after they graduate they go to CSSDO to another feeding and when they go to elementary school they get another feeding program so they don’t get lost,” butyag niini.
Ang SAM gihulagway isip hilabihang mubo nga timbang alang sa gitas-on sa usa ka bata, gani nagpadayon sa gihapon ang ilang programa aron malikay ang subling pagkalakip sa usa ka bata isip SAM.
Kahinumdoman nga tuig 2018, 21 kabuok SAM children ang natala diin bulan sa Enero 2018 nakabaton na og 9.5 percent cure rate.
Karong adlawa, Hulyo 1, 2019, opisyal nga gi-ablihan sa lokal nga panggamhanan ang ika-45th Nutrition Month ilawom sa tema nga “Kumain nang Wasto at Maging Aktibo… Push Natin ‘to!”.
RadyoMaN Jason Amisola
