Davao City- Gi-release sa kapulisan sa Talomo ang ugangan kinsa gireklamong nisabwag og ininit nga sabaw sa biktimang 19 anyos.
Sa interbyu sa RMN Davao kang Talomo PNP Investigator Police Senior Master Sergeant, PSMS Harold Delima, nakakagawas na ang suspek nga si alyas Ria human wala na gidayon og duso sa biktima nga si alyas Jen ang kasong physical injury sa suspek human kini makahiagom og paso sa lawas tungod sa gisabwag nga ininit nga sabaw.
Samtang gibutyag ni DCPO Women and Children Protection Desk (WCPD) head Police Major Elisa Ramirez, girespeto usa nila ang desisyon sa biktima tungod adunay mga ubay-ubay nga gikonsiderang factors.
Hinuon, tutukan gihapon sa WCPD uban ang City Social Welfare and Development Office nga matunulan og intervention ug counseling ang biktima kinsa posibleng makasinati’g postpartum depression.
“Naa lang gyod mi sa gitna to give advice kung unsa gyod ang tama kay dili man pod nato ma-blame ang biktima kung unsa gyod ang reason nganong nagpabilin siya ana nga situation o relationship. Musulod gyod si socialwelfare o ang atong intervention nga counseling aron mapasabot gyod sa iyaha,” sumala niini.
Nakauli na ngadto sa iyahang pamilya sa Panabo City Davao del Norte ang 19 anyos nga biktima uban ang iyahang 2 months old baby.
Kahinumduman niadtong nakalabayng semana nga gi-rescue ug gitambalan sa Barangay Talomo Proper ang biktima nga nagpuyo sa iyahang ugangan didto sa Purok 71 SPED Bangkal.
RadyoMaN Aimee Guinita
