Davao City – Naglibog pa karon ang usa ka bana kung ipatangtang ba niya ang dagway sa iyang asawa nga gipa-tattoo sa iyang lawas human nga nasakpan ang iyang pinanggang kapikas nga nakig-sex sa laing lalake.
Halos kahilakon sa kalagot nga nidangop sa Sta Ana PNP si Ramon (dili tinuod nga pangalan sa bana) 35 anyos, residente sa Piapi Boulevard, syudad sa Dabaw, dala niini ang lalake nga nabun-og ang lawas tungod kay iyang nakulatahan human kini niya nasakpan sa akto nga nakigdulog sa iyang asawa nga pulos walay mga sapot didto mismo si pinuy-anan sa usa ka Nonoy(dili tinuod nga pangalen sa kabit), 28 anyos ang edad, trabahante sa usa ka iladong Mall sa Uyanguren ning syudad.
Sumala sa saysay ni Ramon nga duna na syay pagduda nga nagluib kaniya ang iyang asawa nga si Tita (alyas sa asawa) nga kauban sa trabaho ni Nonoy, tungod sab sa sugilon sa iyang igsoon nga nakamatikud sa pagkausab sa tinagdan ni Tita.
Didto nagsugod siyag paniid sa mga lakaw sa iyang asawa ug kagabii natingala siya nga dugay nakauli si Tita gikan sa trabaho hinungdan nga iya kining gipangita hangtud nga dunay nagtultol kaniya didto sa gipuy-anan ni Nonoy ug kumpyansa ang mga maluibon nga wala manrangka sa pultahan, didto nakahigayon pagsulod si Ramon ug nakita mismo sa iyang mga mata ang iyang asawa nga nakigtagay sa kalipay ibabaw sa kama kuyog si Nonoy.
Bisag wala nay sapot, sugilon pa sa bana, nakahigayon og sibat ang iyang asawa apan nahabilin si Nonoy ug tungod sa iyang sobrang kasuko, iya kining nakulatahan ug dayon gi-endorso ngadto sa kapulisan sa Sta. Ana.
Didto sa presento sa kapulisan, namatikdan sa mga pulis nga nakatattoo pa sa lawas sa bana ang maanyag nga itsura sa iyang pinalanggang asawa nga gipangita na sa kapulisan.
Kasamang Paul Canono
