Con man maridable na provincia de Basilan el ya anda corta pescueso alegaomente el maga miembros del Abu Sayyaf del ayer por la tarde na brgy Mahatalang, Munisipio de Sumisip.
Con el maga victima ya puede identifica como canda Abdurahim Kitoh,legal de edad, residente de Brgy Ettub-Ettub, Sumisip y el de este esposa identificao como si Nadzwa Bahitla, legal de edad,residente de Marang-marang, ciudad de Isabela del mencionao provincia.
Asegun con el commandante del Joint Task Force Basilan / 104th Brigade B/Gen Juvymax R. Uy que antes ya encontra con el maga cadaver del man maridable, ya oi segun sonor de tiro el un miembro del CAA designao na mencionao lugar y cuando ya anda le checkya na location donde ta sale el tiro ya puede le encontra con el cadaver del un mujer, cortao el pescueso na vicinidad del Ismael Elementary School na Sitio Diangan brgy Mattalang.
Alas siete del noche del semehante dia, ya puede tambien recubri con el cadaver di Abdurahim Kitoh que cortao tambien el pescueso.
Base na report del Policia na provincia de Basilan que el responsable na matansa del man maridable asegun grupo di untal Nahim Mustalim que mismo hermano (half-brother) del victima si Abdurahim Kitoh quien sigidores asegun del ASG -leader Rhadzmil Janatul.
Ta aparece na imbestigacion del Policia que el motivo del incidente amo para hace sabotaje con el plano del cuantos maga miembros del ASG para rindi con el maga officiales del Sumisip.
