Davao City – Gitigbas sa tag-iya sa kamaisan ang usa ka lalake human kini nagtugway og binuhing baka sa kaumahan sa suspek nga nahitabo sa distrito sa Paquibato alas 7:00 sa buntag kagahapong adlawa.
Nakaangkon og samad sa likod sa ulo ug sa tiyan si Alberto Cemine, 38 anyos, residente sa Panaga Brgy. Colosas sa mao nga distrito human gitigbas sa tag-iya sa kamaisan.
Sumala ni Demetria Cemine, inahan ni Alberto, nga gisugo matud pa niini ang igsoon sa biktima nga itugway ang ilang baka diin sa kamaisan kini gipahiluna.
Gikaon ug gidaot matud pa sa ilang baka ang mga tanom nga mais ug dihang nakita kini sa tag-iya sa uma gibunalan niini ang baka butang nga gikasuko sa igsoon sa biktima.
Gisulong sa magsoon ang suspek apan sa dalan pa lang daan giatngan na sila ug didto gitigbas ang duha apan si Alberto maoy naigo sa atake resulta sa mga samad nga nahiagoman.
Daling gidala sa Southern Philippines Medical Center (SPMC) ang biktima ug padayon pa kini gina-obserbahan sa medical team sa nasangpit nga balay-tambalanan.
RadyoMaN Joel Viray
