Wala nagtambong ang management sang PRO-FRIENDS sa pagsinapol kahapon, Nobyembre 29, Miyerkules, upod ang mga home owners sa Monticello Villas sa bahin sang Brgy. Balabag, Pavia, Iloilo angot sa pagpanghilo sang mga ido.
Suno sa mga nagapanag-iya sang ido nga sanday alyas Inday kag alyas Neneng, dismayado sila matapos ila nahisugtan sang Lunes upod ang pamunuan sang Brgy. Balabag nga magasapol sila upod ang management sang PRO-FRIENDS kag ang mga gwardiya nga nanghilo sang mga ido apang wala angm ga ini nagtambong kahapon.
Suno kay alyas Inday, nagtawag lang ang General Manager sang PRO-Friends Iloilo nga si Dina Estocado kag ginsilingan ang kapitan nga si Punong Barangay Ariel Gerada nga indi siya makakadto.
Dugang pa ni Inday nga wala man sang security guards nga nagtambong sa sa pagsinapol.
Bangud sini, ginpahayag ni alyas Neneng nga mapasaka sila sang kaso batok sa mga gwardiya nga nanghilo sang mga ido.
Madumduman nga nagpalab-ot sang reklamo sa RMN Iloilo ang pila ka mga residente sang Monticello Villas sa Balabag, Pavia bangud napatay ang ila ginasagod nga ido matapos nanghilo nga wala naghatag sang notice ang mga security guards sa nasambit nga lugar.
