Balhog karon sa balay bilangguan sa Manukan MPS ang dinakpan nga si Felix Recososa Aripal alyas Tatay, 73 anyos.
Nasikop kini siya sa gihimong manhunt operation sa kapulisan sa maong lungsod didto sa Brgy. Upper Disakan, lungsod sa Manukan.
Si Felix adunay tanggong nga warrant of arrest nga gipagula ni Presiding Judge Reymar L. Lacaya, sa RTC branch 11, Dipolog City, penetsahan ug Marso 6, 2018.
May kaso kining Homicide ilawom sa CC no. S-5722, samtang ang korte mi rekomendar ug pyansa sa kantidad nga P40,000mil alang sa iyang temporaryong kagawasan.
Nakuha usab sa posisyon ni Felix ang 18 ka mga buhing bala sa kalibre 45 nga pistol, gibutang kini sa pouch sa Golden Oats.
Sa pagkakaron balhog na sa mabugnaw nga rehas si Felix Aripal aron atubangon ang kasong gipasaka batok kaniya.
Samtang arestado usab ang usa ka pinangita sa balaod human nagpahigayon ug operasyon ang kapulisan sa Liloy didto sa brgy. Patawag sakop sa maong lungsod.
Malampuson nga naaresto si Alberto Oyangorin Balili, 35 anyos molupyo kini sa brgy. Mabuhay lungsod sa Liloy nga kung diin nag atubang kini sa kasong Attempted Murder ilawom sa CC no. L-003334, adunay pyansa nga ge rekomendar ang korte sa kantidad nga P120,000mil alang sa iyang temporaryong kagawasan.
Kahinumduman nalutsan kini ug warrant niadtong Nov. 16, 2017 gikan sa lamesa ni Judge Oscar D. Tomarong sa RTC branch 28, 9th judicial region Liloy, Zamboanga del norte.
Himas rehas na karon si Alberto didto sa Liloy MPS samtang nagpaabot sa tukmang disposasyon.
