Davao City – Naghinamhinam na unta makasapi ang duha ka drug pushers apan giabot sila og dimalas kagabii human sila nalit-ag sa operasyon sa mga pulis sa Buhangin area, Davao City.
Wala magdahom nga katapusang gabii na diay ni Aniel Adi, 20 anyos, ulitawo, estudyante ug nagpuyo sa San Nicolas Buhangin ang iyang gawasnon nga paglatagaw sa area human kini nadakpan alas 9:50 kagabii.
Giposasan ang suspek human gitunol niini ang marijuana sa pulis nga poseur-buyer bugti sa kantidad nga 500 pesos nga maoy naghatud kaniya sa presohan human gikasa ang operasyon sa Km. 5 Buhangin.
Laing duha ka pakete ug duha ka pinutos nga inugang marijuana, 500 pesos mark money ug improvised tooter ang nakumpiska gikan kaniya.
Aron dili mag-inusara sa presohan si Adi iyang gikanta ang iyang kauban sa iligal nga kalihukan busa gilusad ang laing operasyon sa drug enforcement unit alas 12:45 sa tungang kagabhion.
Tungod sa sobrang kumpiyansa sa suspek nga si James Leones alyas Bunso, 18 anyos, nahulog kini sa gipaon sa mga otoridad sa gipahigayon nga buy-bust sa san Nicolas buhangin kagabii.
Narekober sa mga tinugyanan sa balaod gikan kang Bunso ang inugang marijuana ug 500 pesos nga mark money.
Ang duha pasakaan og kaso subay sa kalapasan sa section 5 ug 11 sa republic act 9165 kun Comprehensive Dangerous Drugs Act of 2002.
RadyoMaN Joel Viray
