General Santos City— Swerting nakaluwas ang usa ka 21 anyos nga mananagat human sa duha ka bulan nga nag utaw-utaw sa kadagatan. Patay usab ang uyuan niini ug missing ang usa pa niya ka kaubanan human silang gihapak ug bagyo dihang sila nanagat sa kadagatang sakop sa Indonesia.
Ang biktimang nakaluwas mao si Roland Omongos, 21 anyos nga taga Prk. Balunto, Barangay Labangal . ang nakabsan nailhang si Ringhill Omongos, 31, residenti gihapon sa Prk. Balunto.
Gibutyag ni Rosalie Omongos inahan ni Roland Omongos nga Enero 9, 2017 dihang namissing ang iyang anak ug ang iyang manghod ug usa pa nila ka kaubanan human silang naigo sa bagyo sa lawod dihang sila namareles sakay sa pakura.
Wala na matud pa nakabalik ang tulo sa ilang mother boat nga iyaha sa Alcon Fishing hinungdan nga sila gipangita sa ilang mga kaubanan apan wala na sila nakaplagan.
Marso 10, 2017 duha ka bulan ang nakalabay dihang sila nakadawat ug report gikan sa ilang kaila nga taga Gensan nga matud pa nakaplagan ang iyang anak sa kadagatan nga bahin sa nasud Japan sa usa ka Japanese Vessel niadtong Marso 9, kansa maoy nitabang kaniya.
Dugang pagbutyag sa ginang nga mitawag dayon ang iyang anak ngadto kanila ug sila gipahibalo nga siya buhi apan usa ka masulob-on nga balita human nakabsan gyud ug kinabuhi ang iyang manghod nga si Ringhill human nga wala makaagwanta sa kagutom ug kauhaw samtang sila nag-utaw utaw sa kadagatan.
Nasayran nag usa ka simana pa nga gikarga gihapon ni Roland ngadto sa pakura ang iyang uyuan bisan nga kini patay na sa pamasin nga sila makaplagan apan tungod dili na niya maagwanta ang kabaho sa iyang uyuan, iya nalang kining gianod sa dagat.
Nag hilak intawon nga gisaysay ni Roland kung giunsa niya pagsurvive samtang nag-utaw utaw sa dagat luyo nga tubig ulan ra gyud ang sulod sa iyang tiyan.
Sa kasamtangan ang nahisgutan anaa na sa Papua New Guenea ug gikatakda na kining muuli sa iyang pamilya dinhi sa syudad.
