General Santos City—Gibutyag ni Kath Abad ang tig-pamaba sa PDEA Regional Office-12 nga mga mananagat ang nag-unang customer sa mga negosyante nga silang Arman Bada, asawa nga si Lovely Bada ug ang usa ka Zaldy Ong, pulos taga Maasim, Sarangani Province sa ilang pagpamaligya ug droga.
Sumala pa ni Abad nga ang mga nasangpit, mga myembro matud pa sa El Patron Group ug ginagamit ang mga lihitomong negosyo aron sa pag pamaligya ug droga.
Tungod niini plano sa PDEA nga sikopon ang mga nasangpit pinaagi sa buybust operation sa lawod apan wala matud pa silay saktong pundo ug gamit hinungdan nga ilaha nalang kining giaplayan ug search warrant
Kung nahiumduman nga Domingo sa kaadlawon gisulod sa pdea ang panimalay sa mga nasangpit sa managlahing operasyon sa Brgy. Poblacion, Maasim, Sarangani Province kung diin si Ong ang nakuhaan ug pakite sa shabu nga adunay gibug-aton nga 11 ka gramos nga nagkantidad ug P55,000.00, samtang ang magtiayong Bada ang nakuhaan ug mukabat 30 gramos sa gikatahapang shabu nga anaa ug P150,000.00 ang street value.(Dave Silagan)
