Mananagat namatay sa lawod, abtik nga girespondehan sa Coast Guard

Davao City – Patay ang usa ka mananagat nga sa sakay sa Fishing Bangca Meboy tunga sa lawod sa Mati City. Ang biktima giila nga si Alyas “DanDan”, 53 anyos, lumulupyo sa Purok Tagawisan, Barangay Badas.

Gipahibalo gilayon sa kapitan sa banca ang insidente pinaagi sa tawag sa Coast Guard Station (CGSS) Pujada.

Human madawat ang pahibalo, dali nga nagkoordinar ang Coast Guard sa CDRRMO Mati alang sa pagpadala og ambulance, ug sa Philippine Ports Authority (PPA) Mati alang sa berthing space. Gipahibalo usab ang pamilya aron adunay direkta nga koordinasyon. Samtang, pag-abot sa Davao Oriental Provincial Hospital, gi-deklarar sa attending physician nga dead on arrival si Dandan.

Misimpatya sab ang Coast Guard Davao Oriental ngadto sa pamilya sa namatay. Gani, matud pa nga sa matag panaw sa kadagatan, andam kanunay ang buhatan nga moalalay, mohatag og tabang, ug mosiguro nga bisan sa kalit nga kamatayon, adunay hustong pag-atiman. Ingon man magapadayon sab sa pagbantay sa kaluwasan sa kadagatan.

RadyoMaN Kareen Beltran