Davao City – Imbes ang isdang balu ang pukuton ug ibutang sa ice box ang mananagat naman hinuon ang gidala sa Southern Philippines Medical Center human nataroy ang sungo sa isda sa iya nga liog.
Nagtaroy pa ang nabali nga sungo sa isdang balu sa liog sa mananagat nga si Ben Barani, 18 anyos, ug residente sa Sasa ning siyudad samtang gidala paingon sa SPMC 7:00 sa kagabhion.
Suma sa amahan sa biktima nga nananghid ang ulitawo nga managat aron manguha og isda 6:00 sayo sa gabii ug pag-abot sa lawod iyang giitsa ang pukot aron madakpan ang mga isda.
Ug pipila ka gutlo nakalabay nagbug-at ang pukot ug timaan daghan nang isda nakuha busa gihakwat sa biktima ang gibalibag nga pukot.
Apan wala damha sa biktima nga dunay naglupad nga isdang balong nga taas ug hait og sungo paingon sa iyang liog busa maayo pagkataroy hangtud nabali kini.
Wala na gisulti sa traumatic center sa SPMC kun natam-an ug naibot na ba sa sungo gikan sa liog sa biktima.
RadyoMaN Joel Viray
