Mananagat nga na-missing, luwas nga nakauli

Davao City – Nahimong emosyunal ang panagkita sa asawa ug bana niining mananagat nga si Arnel Torrejano, ang 37 anyos nga taga Barangay Pangubatan, Island Garden City of Samal (IGaCoS), human kini gikatahong na-missing og tulo ka adlaw sugod niadtong Domingo, Agosto 27, 2023.

Dako ang pagpasalamat sa pamilya ni Torrejano human nga luwas kining nakauli alas 11:00 sa buntag kagahapong adlawa, Huwebes, Agosto 31, human kini nakulgot sa dagat, diin gihikot na lamang niini ang iyang kaugalingon sa usa ka payao aron dili sya maanod og layo.

Sa pakighinabi sa DXDC RMN Davao kang Vasit Venturillo, Station Commander ng Coast Guard Station – IGaCoS, iyang gibutyag nga nakit-an ug na-rescue si Torrejano sa mga mananagat nga taga Lupon, lima ka kilometros gikan sa baybayon sa Talicud Island.

“Sa pagkusog sa balud, naanod sya hangtud nga naabot ngadto sa area. Naa syay nakita nga payao, didto sya nagpondo. Hangtud sya nga gi-attempt niya og ayo ang iyang bangka adlaw sa Domingo ug Lunes sa buntag, wala gihapon kini maayo,” sulti ni Coast Guard official.

Pahimango sa mananagat sa publiko nga siguradohong kondisyon ang bangka o ang sakyanan ayha mubiyahe sa lawod aron malikayan ang susamang insidente.

RadyoMaN Kirby Manzon