Hindi magtatagal at mahuhuli ang mga suspek sa Isulan bombing sa tulong ng artist sketch.
Ayon kay PNP Chief PDG Oscar Albayalde mayroon na silang artist sketch na hawak pero hindi pa nila opisyal na ipinapalabas dahil may mga hinahanap pang mga ibang persons of interest.
Ayon sa PNP Chief, hindi nag-iisa ang suspek na nagtanim ng bomba sa lugar kung saan nagtipon-tipon ang mga tao para ipagdiwang ang kapistahan sa Isulan noong Martes ng gabi.
Kwento ni Albayalde, ang suspek ay nakita na inilalagay ang isang bag na umano ay naglalaman ng IED sa ilalim ng motor na pag-aari ng isang CAFGU.
Nang sitahin ng mga autoridad sa kanyang kahina-hinalang kilos, tumakbo ito at nakatakas sa pamamagitan ng tulong ng isang naka-motor pa na nag-aabang sa kanya malapit sa lugar.
Hindi na aniya nahabol ng CAFGU ang mga suspek at doon na sumabog ang bomba.
Pero sinabi ni Albayalde na dahil sa maraming nakakita sa mga suspek, ay hindi magtatagal at matutukoy ang mga ito mula sa artist sketch.
