Sa panahon karon, lisud na mabuhi sa kalibutan kung wala kay kwarta busa sig-iya ang kada usa kanato sa pagpanginabuhi ilabina kadtong mga ginikanan na o mga pamilyado na nga adunay gipa-eskwela nga mga anak.
Ingon nila, daghan na daw klase sa trabaho ang pwede nimong masudlan. Adunay de opisina, naa pu’y sa field ug naa pu’y gitawag nga “Online Job”. Apan subo pamalandungon nga mas daghan pa ang ihap sa aplikante kaysa sa ihap sa bakanteng posisyon ilabina sa pang-gobyerno nga trabaho. Daghan usab ang mu-ingon nga “maayo lang daw ang manarbaho kung aduna pud kay insaktong nahuman o di ba kaha ‘Backer’ nga makatabang sa imo nga makasulod og trabaho”.
Kung negosyo usab ang hisgutan, daghan na daw pwede i-negosyo sa panahon karon. Pwede pagkaon, sinina o di ba kaha serbisyo. Apan subo usab pamalandungon nga ma-ihap lang usab ang klase sa negosyo nga ikaw ra ang nakahibalo kay halos tanan dali ra man matun-an kung kabalo lang ka mag-research gamit ang internet. Daghan usab ang mu-ingon nga “maayo lang daw ang mag-negosyo kung naa kay insaktong puhunan”.
Manarbaho ka man o mag-negosyo, pareho lang nga manginahanglan kag kwarta. Adunay uban nga musulod una og maski unsang trabaho para lang makatigum og pampuhunan sa giplano nga negosyo. Aduna pu’y uban nga musulod og Networking kay sa gi-ingon pa nga sa Multi-level marketing (MLM), laway ra’y puhunan.
Kung ikaw ang pangutan-on idol, asa man sa duha ang mas maayo sa panahon karon? Manarbaho o mag-negosyo?
Para sa imong opinyon, mahimo nimo kining i-comment sa ubos.
