Davao City – Dili sumala pa praktikal ang gipagawas nga Executive Order (EO) sa City Government of Davao nga pag-require og negative reverse transcription-polymerase chain reaction (RT-PCR) test result ug chest X-ray sa mga indibidwal nga buot lamang magpacheck-up sa mga ospital dinhi sa dakbayan.
Sa interbyu sa DXDC RMN Davao kang Dr. Jeff Ho, usa ka Medical Doctor, gibutyag niini nga ma-defeat ang purpose sa mga tawo nga buot unta maulian sa ilang balatian apan tungod ‘duna pay kinahanglan nga mga requirements sama sa RT PCR ug X-ray, mas pilion na lang nila nga dili magpa-check up.
“Kung walay kwarta ang pasyente mag antos nalang sila sa ilang gibati (sakit) unya kay dili man sila ganahan muadto’g SPMC kay ‘hadlok lagi sila. Kung sa private (hospitals) nalang ang huling baraha nila, baka mamaya walang test result, hindi na sila pupunta, delikado pud,” saysay ni Ho.
Gipasabot sa health worker, igo na ang kasamtangang health measures nga ginapatuman sama sa pagsuot og face mask, face shield ug social distancing aron malikayan ang posibleng pagtakod sa COVID-19 sa posibleng carrier sa maong virus.
RadyoMaN Abi Bibera
