Davao City – Patay ang usa ka electrician human luthangan sa duha ka wala mailhi nga suspetsado nga nakamotor sa Mandug, distrito sa Buhangin ning siyudad Sabado sa gabii.
Giila ang biktima nga si Apolonio Maranan, alyas Totoy, 63 anyos, minyo, electrician ug nanimuyo sa Tupaz St. DDF Village, Mandug, Buhangin ning dakbayan.
Sumala ni SPO1 Plaza, imbestigador sa Buhangin PNP, gikan nagtaya og lotto sa small town lottery sa mao nga lugar ang biktima dihang gidul-it kini pagpusil sa makadagahang higayon sa duha ka suspek alas 7:50 sa gabii.
Nakahiagom og daghang samad pinusilan sa lawas si Maranan resulta sa hinanaling kamatayon niini.
Sa mao nga panghitabo, na-igo sa tuhod ug paa si Vivian Lobo, residente sa sama nga dapit, tungod sa saag nga bala busa dali kining gidala sa Southern Philippines Medical Center (SPMC).
Ang Scene of the Crime Operatives Regional Office 11 (SOCO-XI) nakarekober og walo ka empty shell ug usa ka deformed slug nga iya sa .45 nga pistola gikan sa nahitaboan.
Blangko pa ang mga otoridad sa motibo sa pagpamusil patay ug wala usab mailhi ang mga mamumuno nga nakamotor.
RadyoMaN Joel Viray
