Roxas City, Capiz- Ginpasalamatan sang Deputy Chief of Police sang Roxas City PNP nga si Police Senior Inspector Larnel Frial ang mga persona nga naghatag sang impormasyon sa ila agod nga madakpan ang mga persona nga responsable sa pagpanghold-up sa Brgy. Bolo kag Brgy. Dinginan sang nakaligad nga Hunyo 26, 2018.
Kadungan sini, ginpanugyan naman ni Frial sa publiko nga mangin alerto ilabe na kun magpauli sa tagsa ka poluy-an sa tion sang gab-e.
Mahibaloan nga positibo nga ginkilala sang biktima nga Brandon Lozada ang isa sa duha ka nadakpan nga suspek nga nahold-up sa iya samtang ini ang nagapauli sa ila poluy-an.
Gintumod sini nga ang isa sa mga ini amo ang nagserbe nga driver sang motorsiklo nga ila gingamit sa krimen.
Suno kay Lozada, kulang na ang mga narekober nga items kag gadgets sa mga suspek.
Suno sa kapulisan ang isa ka suspetsado nga nadakpan amo ang kuntani magabaligya sang ila nga kinawatanan samtang ang isa sa mga kaupdanan sang mga ini ang padayon pa nga ginapangita.
(photo credit to: Roxas City PNP PCR section)
