Bacolod City – Ginkalipay sang mangingisda nga si Theodore dela Vega, 47 anyos sang Purok Mabinuligon, Barangay Sum-ag syudad sang Bacolod ang pagrescue sa iya sang mga crew sang isa ka fastcraft.
Suno kay Chief Officer Renz Rigo Mulle sang SuperCat St. Emmanuel nakit-an nila ang biktima nagautaw-utaw sa tunga sang lawod las 3:45 ang takna kahapon sang hapon.
Sa report sang Philippine Coastguard, sang udto may nabaton sila nga impormasyon nga may isa ka baroto nga nagkulob bangod man sa mabaskog nga balod.
Suno kay De La Vega nga wala siya nakit-an ukon nanotisyahan sang mga naga-agi nga barko padulong sa Iloilo tubtob nga naagyan siya sang Supercat.
Pagkatapos rescue, ginpasakay ini sa fastcraft, gintagaan pagkaon kag panapton lakip man first aid.
May mga pasahero man nga naluoy sa iya kag gintagaan ini sang kwarta.
Ginkalipay naman ini ni Dela Vega bangod daku na ini nga bulig sa iya bangod solo nga palangabuhian sini amu ang pangisda para saguron ang iya kabataan bangod ginbiyaan man ini sang iya asawa.
