Davao City – Nagpasalamat ang pamilyang Mangudadatu sa nahimong desisyon sa korte labot sa kaso sa Maguindanao massacre human sa napulo ka tuig.
Sa exclusive interview sa DXDC RMN Davao sa bayaw ni Gov. Toto Mangudadatu nga wala nalang nagpaila alang sa ilang seguridad, gibutyag niini nga nahatagan og hustisya labi na ang pagka ‘convict’ sa mga primary suspects sa krimen sa pamilyang Ampatuan.
“Dinhi karon sa panghitabo sa pagka konbikto, nagpasalamat mi nga sa napulo ka tuig nga pagdagan sa kaso, karon pa natagaan og hustisya sa mga nabiktima,” saysay niini.
Apan gitataw niini nga dili pa maingon nga hingpit nang nakab-ot ang hustisya tungod kay aduna pa usay mga kasong na-dismissed o acquitted diin angay sutaon pagmaayo sa korte sa posibleng kalambigitan sa nahisgutan sa maong krimen.
“Natagaan og justice pero kini karon nga naa pay nagpabilin, dili pa ko makatawag o makaingon nga nakuha na gyud tanan ang hustisya,” tataw niini.
Nasayran nga nahukman og reclusion perpetua nga walay parole ang mga prime suspects sa Maguindanao massacre kagahapong adlawa, December 19, 2019 human ang usa ka dekada.
RadyoMaN Kirby Manzon
