Davao City – Mikasa na og manhunt operation ang Tracker Team sa Tagum PNP batok sa mga tulisan kinsa nakuhaan pa og cctv footages sa managlahing establisiemento nga ilang gipanghulga ug gipangkawatan.
Sumala ni Tagum PNP spokesperson PSI Anjanette Tirador aduna na silay lead kinsa kining tulo ka mga suspek sa robbery with intimidation incident nga nanion og kutsilyo ug kinawat usab nga shotgun sa ilang mga nabiktima.
Sumala sa mga operatiba naa sa 20 anyos ang pangedaron sa mga suspetsado.
Ang mga suspek maoy giingong gitudlo nga nanulis sa Premier Image Medical SPA sa Purok 1-A, Brgy San Miguel diin gilimas niini ang cellphone ug 3,000 pesos nga kwarta alas 10:49 sa gabie niadtong Martes.
Samtang ala 1:45 sa kadlawun adlawng Miyerkules, gitulis usab ang JRJF Hotel sa Santo Niño, Dalisay Gante Road, Brgy Magugpo West ug nakuha ang cellphone sa security guard nga on duty sa nasangpit nga establisiemento ug nadagit usab sa mga tulisan ang issued shot gun niini.
Ulahing biktima sa mga suspek bandang 5:30 sa kadlawun Miyerkules ang ROYAL Budget Inn sa Abad Santos Street, Barangay Magugpo Poblacion ug nakuha ang 3,000 pesos nga kwarta lakip ang cellphone nga mukantidad og 13,000 pesos diin gipangtiunan usab og shotgun ug kutsilyo ang mga tindera.
Human sa mga panghitabo, daling misibat ang mga suspek padulong sa mga wala matinong lugar.
Gituohang daghan pang mga tindahan ang nabiktima sa mga tulisan sa syudad sa Tagum.
RadyoMaN Aimee Guinita
