Davao City- Nilusad og manhunt operation ang Davao City Police Office (DCPO) batok sa duha ka mga suspek sa pagpanulis-patay sa negosyanteng Chinese national.
Gibutyag ni DCPO City Director Police Col. Kirby John Kraft nitukod na og team ang kapulisan aron masikop ang mga giidentipikang mga suspek nga sila Amrix Macarimbang ug Hanafiy Macarimbang, parehong mga residente sa Purok 4, Isla Verde, Brgy. 23-C ning syudad kinsa mga empleyado sa WJF warehouse.
Sa imbestigasyon nasayran nga gidunggab sa makadaghang higayon ug gihapak og bato ang biktimang si Xu Li Zhen, 50 anyos nga niresulta sa iyahang kamatayon.
Gidagit matud pa sa mga suspek ang P1M cash sa maong Chinese national.
“Sila iyong nakita sa CCTV pinatay nila, sinaksak nila, inano ng bato sa ulo, kinuha nila iyong pera. Identified talaga sila,” sumala ni Kraft.
Adunay ganti kun reward nga P30,000 sa makatudlo o makahatag og impormasyon sa kada suspek.
Alas 9:00pm niadtong Agosto 25, 2020 napalgang nagbuy-od sa iyahang kaugalingong dugo ug narekober sa crime scene ang nagkadugo nga improvised nga gunting ug bato tapad sa lawas sa biktima.
(Aimee Guinta)
