Gipangusgan na karon ang manhunt operations batok sa managsoon nga brutal nga mipatay sa usa ka trisikad driver dool sa West City Central School sa Ilaya Carmen niadtong Huwebes.
Bisan pa man nga walay order gikan kang city police director Senior Supt.Roy Bahian nga mas hingusgan pa ang maong manhunt apan matud pa ni Chief Insp. Mardy Hortillosa nga gipaspasan pa gihapon nila ang pag pangita ug pagdakup sa mga suspetsado nga sila si Jordano Binalay ug igsoon niini nga si Bevarcilo.
Ang Binalay brothers ang nailhan karon nga maoy responsible sa pagpatay sa 37 anyos nga sikad driver nga si Napoleon Quimada nga taga Calaanan, Canitoan sa Vamenta Boulevard niadtong Huwebes sa kadlawon.
Wala pa nahibaloan ang motibo sa pagpatay kang Quimada ug kung ngano nga gitabangan sa managsoon ang maong biktima. Gilakag matud pa sa managsoon ang sikad driver ug gidunggab ug kutsilyo ug wala pa makontento sa dihang gitigbas pa nila kini gamit ang mahait nga bolo sa ulo nga maoy gikamatay sa biktima.
Giandam na matud pa si Senior Insp. Demver Vergara, ang Carmen police chief ang kasong murder batok sa Binalay brothers sa City Prosecutors office apil na ang nakaandam na nga mga affidavits.
Lumad nga taga San Franciso, Agusan del Sur ang mga suspek nga nagpuyo sa Zone 11 Carmen ug karon nagpadayon pang nagtago-tago sa kapolisan human sa nabuhat niining salaod.
