Patay ang maninoy matapos ginlabu sang iya ihado sa kasal kaina sang aga (Agosto 10) sa sitio kapinyahan, Barangay Badiangan, Ajuy, Iloilo.
Ginkilala ang biktima nga si Renato Baloro, 65 anyos samtang ang suspek nga ihado sini ginkilala kay Joseph Borres alyas Lot-lot, 40 anyos , pumuluyo sang nasambit nga lugar.
Ginpahayag ni Police Lt. Roy Castor, OIC sang Ajuy Police Station nga natabu ang insidente mga alas 7 kaina sang aga samtang nagasakay sa motorsiklo ang suspek nga si Borres sang ginbanggaan ini sang iya maninoy nga si Baloro kag ginkomprontar angut sa ila daan nga hiligut-anon.
Suno kay Castro nga ginhanot ni Baloro sang baston sa ulo si Borres kag gintuyo pa gid nga luthangon apang wala maigo.
Bangud sini, nagdalagan si Borres agud malagyo apang ginlagas ini sang iya maninoy.
Nalab-ot ni Baloro ang iya ihado nga gilayon naggabot sang binangon kag ginlabu ang iya maninoy nga nakaagum sang pilas sa ulo, likod, kag iban nga parte sang lawas.
Gindala pa sang Sara District Hospital ang biktima apang gindeklarar nga dead on arrival samtang boluntaryo naman nga nagsurrender ang suspek kag natalana nga pasakaan sang nagakaigo nga kaso.
