Davao City – Personal grudge may kalabutan sa land conflict ang ginalantaw sa Marilog PNP sa pagpusil patay sa 55 anyos nga kapitan sa Brgy. Datu Salumay, Marilog District Amado Mansabid pasado alas-6:00 sa gabie niadtong Sabado, Oktobre 2, 2021, sulod sa iyahang tindahan.
Sa interbyu sa RMN Davao kang Police Captain Philip Dave Uddin, Officer-in-Charge sa Marilog Police Station, ginasubay na nila karon ang posibleng mamuno nga nipusil sa biktima.
“Naa man gud miy person of interest, amoa pa lang gina-validate ug gipatan-aw sa amoang witness kung mao gyod to siya,” sumala ni Uddin.
Nakahiagom og daghang samad pinusilan sa nagkadaiyang parte sa lawas ang punong barangay nga hinungdan sa iyahang kamatayon.
Matud sa mga menor de edad nga mga pag-umangkon sa biktima kinsa mga saksi sa insidente samtang nag-andam sila og panihapon usa ka lalaki ang naka-helmet, naka-face mask, naka-jacket og gray ug naka maong nga pantalon ang niduol ug nangutana kung asa ang kapitan ug gitudlo nila kini nga natulog sa tindahan ug didto gipaulanan og bala ang biktima.
Pito ka mga fired cartridge sa .45 kalibreng baril ug upat ka slugs ang narekober sa SOCO sa crime scene ug kasamtangang gisumite alang sa ballistic examination.
Niadtong Sabado gidala ang patayng lawas sa kapitan sa Freedom Life funeral homes sa Calinan ug gihaya na kini karon sa ilahang panimalay sa Datu Salumay.
RadyoMaN Aimee Guinita
